اعقدي /بقلم فريدة صغروني

اعقدي الفولارة و زيد اعقدي و زيد ،،،

اعقدي الفولارة و زيد اعقدي و زيد ،،،
ها ، الثنايا غدارة و انت بين هواء و حديد ،،،

اعقدي الفولارة و زيد صر صرتها ،،،
ها العيشة الكلبة  ما امر خبزتها ،،،

اشقي بنت بوزيد و اعقدي الفولارة ،،،
في جرتك الربح ، في جرتهم الخسارة ،،،

قرطي الفولارة و هانا ساكتين ،،،
نخدموا على حارة و كعبة و كعيبتين ،،،

يقسموا خبزتنا ،،، و يوكلوا ثمرتنا ،،،
و ينكدوا عيشتنا ،،، و هومة  لابدين ،،،

اعقدي الفولارة و شهدي بالشهادة ،،،
ها الروح ما اقربها مشدودة بجدادة ،،،

اعقدي الفولارة و زيد اعقدي عقدتها ،،،
شماتة في مية و شماتة في تلهويثتها ،،،
تدافع ع النساوين و على بنات جلدتها ،،،
انت ماكش من الحقوقيين ،،، و ماكش بنت حومتها ،،،
 ماكش من القرايين ،،، ما عندكش شهادتها ،،،
لا يسلم فمها و لا يسلم قرايتها ،،،

اعقدي للة البية و استر يا ستار ،،،
كياص تونس خوان و غدار ،،،
و ابن آدم آش ما جاء ، يتكسر فخار ،،،
و إل كلاهم الكياص ، يمشمشهم السبيطار ،،،
و إل بداهم الكياص ، يكملهم السبيطار ،،،

يا للة البية ، يا بنت الاحرار ،،،
 اعقدي الفولارة باش تخلصي بدينار ،،،
و اخدمي على محرزية ،
باش تصرررفهم بالأورو و لا تصرررفهم
بالدولار  ،،،
بكيفها هي حرة ، تعمل ما تختار ،،،
نوكلوها قرط يوكلوها كافيار ،،،

و ع الفوالارة الخضراء ، بالنوارة الحمراء ،،،
كتلبسها الحرة و تخطم و تدور ،،،
ك تشق السواني و تثووور الميتور ،،،
تقول عليها الزازية مخبلة في الشعور ،،،

يا بنت الفجاجي يا  بنت البرور ،،،
يا شقرا يا سمرا يا بدر البدور ،،،
ينسوك و تصبحي  ماضي ،،،
 الشعب ما هواش راضي ،،،
غير صابر و ساكت و ساكت مقهور ،،،

فريدة صغروني خنساء بوزيد
نندبهم على الحراير و نزيد نندب و نزيد ،،،
                                              2019/04/29